ای ولایت اهلینون مولاسی یا صاحب زمان

استمداد از حضرت مهدی(عج)

 

ای ولایت اهلینون مولاسی یا صاحب زمان
نخل توحیدین گل رعناسی یاصاحب زمان
**********
گل زمان طوفاندی ای عصروزمانین صاحبی
سندن ئوزگه یوخ بوگون اسلامیانین صاحبی
گل جهانی روشن ایله ای جهانین صاحبی
تاقورولسون معدلت شوراسی یاصاحب زمان
**********
گل ییغیشدیر دهردن کفر و ظلالت پرچمین
ویر هامی عالملره حقّ وعدالت پرچمین
نصب ائله هریاندا اسلامین اصالت پرچمین
دولدورا دنیانی حقّ آواسی یاصاحب زمان
**********
ای ولیّ الله اعظم حجّت کبرای حق
وی قویان باشه شرفدن تاج کرّمنای حق
ای امام کون وامکان آیت عظمای حق
کایناتین باعث ابقاسی یاصاحب زمان
**********
یئریوزونده ای جلال کبریا نین وارثی
انبیانین جانشینی ، اولیانین وارثی
هارداسان گل ای شهید کربلانین وارثی
قوی گؤرونسون کربلا غوغاسی یاصاحب زمان
**********
سن بوگون ارض وسمانین باعث ابقاسی سن
واقعی صلح جهانین ضامن اجراسی سن
دردمندان زمانین ملجاء و مأواسی سن
ای هامی مظلوملارین ملجاسی یاصاحب زمان
**********
روزگاری غم دوتوب ای روزگارین صاحبی
کسمه فیض لطفون ای خرد وکباریم صاحبی
ذوالفقارون آل اَله ای ذوالفقارین صاحبی
صلحه بسدی تیغیوین ایماسی یا صاحب زمان
**********
ای جهانین صاحبی تئزگل جهان آلماقلیقا
ادّعا صاحب لریندن امتحان آلما قلیقا
جدّوون قانین توکنلردن ده قان آلما قلیقا
جوشه گلسین بیرده قان دریاسی یاصاحب زمان
**********
کربلاده کوفیان ظلمونده طغیان ائتدیلر
آل طاهانین مبارک خاطرین قان ائتدیلر
ظلمیله انصاردینی قانه غلطان ائتدیلر
هرشهیدین دوغرانوب اعضاسی یا صاحب زمان
**********
غصّه دن اهل ولانین خاطری قان اولدی گل
ظلمیله ای مصلح عالم بو عالم دولدی گل
صرصرِ ظلمیله دینین گلستانی سولدی گل
سلب اولوب اسلامیان یاراسی یا صاحب زمان
**********
سیّدی سنسن بوگون اسلام ودینین عزّتی
مفخرعرفان و قرآن مبینین عزّتی
گل بنای کفری ییخ ای مؤمنینون عزّتی
بوگونون بولسونله وار فرداسی یا صاحب زمان
**********
خائن اللرتفرقه سالماقداطغیان ائلییب
دین آدیلا قصد جان اهل ایمان ائلییب
قارداشی قارداشه دشمن قوم عدوان ائلییب
گل گئدیب قارداشلیقین معناسی یا صاحب زمان
**********
سالدیلاربیگانه لر قارداشی قارداش جانینه
دشمن ایمندی ،دوشن ،یولداشدی یولداش جانینه
گل بوقدری قویما اسلامین دگه داش جانینه
تار اولا اسلامیان دنیاسی یاصاحب زمان
**********
سیّدی اسلامی امتلرده وحدت قالمیوب
درک ائداخ ضربت بیزه هارداندی فرصت قالمیوب
خلقلرده عدل و انصاف ومرّوت قالمیوب
یوخدی دنیانین مگرعقباسی یا صاحب زمان
**********
سالمیری یاده چوخ انسانلار عذاب آیاتینی
چوخلاری یاددان چیخاردیبلار حساب آیاتینی
ایلیوب انکارچوخ چوخلارحجاب آیاتینی
یوخدی غیظ حقّدن پرواسی یاصاحب زمان
**********
باغلانیب احبابه امیّد و رجانین یوللاری
سیّدی وارسنده هردرده دوانین یوللاری
بیرنظرقیل امن اولا کرب و بلانین یوللاری
اویولون اُلموش حزین شیداسی یاصاحب زمان
**********
شعراز:حیدرخسرو شاهی حزین

/ 0 نظر / 10 بازدید