چون وداع ائیلدی دنیانی اوْ گون میرحنین

شهادت حضرت علی(ع)

 

چون وداع ائیلدی دنیانی اوْ گون میرحنین
آلدیلار تخته تابوتینی دوشه حسنین
**********
باش آچوب زینب کبری ائدیب افغان بوگئجه
اهل بیت شه دین اوْلدی پریشان بوگئجه
شاه مردانه اوْلوب شام غریبان بوگئجه
فلکین چرخینی بیلمم،نیه اوْلمازدی خراب
بوتُرابی بوگئجه آلدی قوجاغینه تراب
**********
وادی ملک نجف تاپدی ابد عزّوْشرف
اوْردا دفن اوْلدی گئجه باش یارالی شاه نجف
قئیدوب گلدی اوْغوللار هامیسی شهره طرف
یتدی اوْغلی نئچه قیز دوتدولا یاسین بوگئجه
مجلس ختم قوروب آلدی دعاسین بوگئجه
**********
گلدی باش ساغلیغا مردم قورولوب مجلس خاصّ
گتدیله قاتیلی شهزاده حسن آلدی قصاص
بیر قلج ووردی عدالتله اوْنی ائتدی خلاص
قاتیلین ئؤلمه‌گی بیر نوع وئریب قلبه صفا
یادیمه دوشدی گینه واقعه‌ی کرب وْبلا
**********
یئرده قالدی اوْرادا شاه شهیدان بده‌نی
نورخورشید اوْلوب اوْل شاه لب عطشان کفه نی
یارالی سینیه چخمشدی اوْ گون شئمردنی
باخمادی زینب بی‌چاره تؤکور گؤز یاشینی
دالیدان کسدی عداوتله حسینون باشینی
**********
نه اوْنی دفن ائد‌ن اوْلدی نه ده مجلس قورولوب
خیمه‌سی یاندی یتیم قیزلارا قمچی وورولوب
فاطمه گوللری گلشنده عداو‌تله سوْلوب
زینب غمز‌ده ‌نین حال پریشانینه باخ
گل حسین‌ ابن علی‌نین شام غریبانینه باخ
**********
بیریانان چادر ایچینده یاتوب اولادعلی
صبحه تک لیلی چکوب قلبیده فریادعلی
سالموسان لیلینی گؤزد‌ن ائوین آباد علی
قلبیمین دفترینون مالک وْسردفتری‌سن
اوره‌گیم بندی بالا سن دیلیمین ازبری‌سن
**********
بیردعا مجلسی اوْل شاهه اوْ گون قورمادیلار
باجینی قزلارینی آغلاماغا قوْیمادیلار
غار‌ت اهلی نقد‌ر غار‌ت ائدوب دوْیمادیلار
ال آتوب بیر بالا گهوارییه لشگر دئدیلر
سوایچوب صاحبی اوْخدان علی اصغر دئدیلر
**********‌
گه گئد‌ن غار‌ته گهوار‌نی ساخلاردی رباب
اصغرین اوْخشیوب عالملری داغلاردی رباب
سوایچوب دؤشلرینه سود گلوب آغلاردی رباب
آنوْن ئؤلسون صودومی قوملارون اوسته ساغیرام
بولمور‌م هارداسان اصغر گلوب اوْردان چاغیرام
**********
عشقیوین آتشینه گؤر نجه اوْدلاندیم علی
سن عطشد‌ن ولی من سن گولومه یاندیم علی
سن بوْغازدان ولی من سینه ده‌ن اوْخلاندیم علی
یاندی قلبیم باشی ای حرمله یانسون اور‌گین
قورییدی اوْخ آتان وقتیده ظالم بیلگون
**********
نه بولئیدیم قوجاقیم نوْگلی پرپراوْلاجاق
اوْخلانان عرصه‌ی جنگاهیده اصغر اوْلاجاق
صود امر قاتلی بیرمرد ستمگراوْلاجاق
آچمیان دل،قوجاغیم زینتی ای‌وای بالا وای
بیردوْیونجا دئمدیم من سنه لای‌لای بالا وای
**********
کوفـه شهرینده اگرشیرخدا اوْلدی نزار
لیک اوْغلانلاری دفن ائتدی اوْنا قازدی مزار
قیزلاری اوْلمادی عریان دوه‌نین اوسته سوار
کربلا دشتینی دوتموشدی اوْ گون آه وْفغان
بابا دفن اوْلمامیش اوْلدی بالاسی شامه روان
**********
ووردولار ضربت اگر شیرخدانین باشینا
وورمادی قانلی باشین خولی جدانین باشینا
باجیسی سؤیلمدی شاه هدانین باشینا
ناقه ده‌ن سس وئریر‌م ناطق قرآن سسیوه
اوْخی قرآن!اوْلا زهرا قیزی قربان سسیوه
**********
ووردی شمشیر اگر حیدرکرّاره عدو
چکمدی قیزلارینی کوچه‌ وبازاره عدو
قوْیمادی اهل عیالین بیله آواره عدو
ییرمی بئش ایل گراوْلوب شیرخدا خانه‌نشین
اوچ یاشندا بالاسی اوْلمادی ویرانه‌نشین
**********
نادری خاتمه وئر مطلبه اوْدلاندی قلم
وورگیلن نیّت پاکیله بودرگهده قد‌م
سائله قاعده دور لطف ائد‌رارباب کر‌م
طیّب وْطاهر اوْلان باب کرامتدی بولار
شافع روزجزا،کان صداقتدی بولار
**********
شاعر : نادری

/ 0 نظر / 12 بازدید