سونوری شمع عدالت بوگجه

شب بیست ویکم رمضان

 

سونوری شمع عدالت بوگجه
جان ویرور شاه ولایت بوگجه
آغلا ای اهل ولا  جان ویرور شیر خدا
**********
بو گجه حیدره آخر گیجه دی
فاتح خیبره آخر گیجه دی
آزقالیر شمس ولا ائتسون افول
حق دیین دیللره آخر گیجه دی
**********
بو گجه کوفه ده محشر اولاجاق
حسنینون گوزی گل تک سولاجاق
سالاجاق فاطمه قاره باشینا
آناسیز زینب آتاسیز قالاجاق
**********
بو گجه قلب ملائک یانوری
حسنینون ئورگی اودلانوری
بیت مولانی عزاخانه اولوب
زینبون غملی گونی باشلانوری
**********
بوگجه زینبه محشر یارانار
باخار حسرتله ابوالفضله یانار
توکر اشکین ئوزونه حسرتیله
باشینه شیر خدانین دولانار
**********
بو گیجه جان شه مردان ویروری
غصه لی عمرونه پایان ویروری
آز قالیر دیده رحمت یومولا
آتاسیزلار آتاسی جان ویروری
**********
بو گیجه ماه عدالت باتاجاق
بوفنا عالمی گوزدن آتاجاق
فاطمه گوللری غمدن سولاجاق
کوفه ایتامیلری آج یاتاجاق
**********
بو گجه گلشن زهرا سولاجاق
جبرئیل باشنه قاره سالاجاق
چوخلاری بو گیجه یول گوزلیجاق
چوخونون گوزلری یولدا قالاجاق
**********
آچ گوزون گور نه پریشاندی قیزون
غصه دن باغری دولی قاندی قیزون
بیرده آچ قانلی گوزون باخ یوزومه
یومولان گوزلره قرباندی قیزون
**********
آنام اولسیدی گر،ای جان جهان
دردیوه چاره تاپاردی بابا جان
ئولدورردی ئوزونی بیکس آنام
سنی گورسیدی بیله ئوز گوزی قان
**********
آنام ئولدی سنه غملر قالدی
یاندی قلبون ئورگون دردآلدی
سن بو یاره یله بابا ئولمزیدون
آنامین دردی ایاقدان سالدی
**********
آنامیزدان صورا سن گولمزدون
او،ئولندن ئوزیوی بولمزدون
آنامین دردی سنی ئولدوردی
آنام اولسیدی بابا ئولمزدون
**********
آغلارام دلدیه کی نسگللریوه
ظلمیله قانه باتان تللریوه
بوینی چگنینده قالوب گللریوون
آچ گوزون باخ بو سولان گللریوه
**********
قاتلون بولمدی قلبون یارادی
عمریوین دفترینی پارچالادی
شل اولیدی الینی قاتلوین
نیلمیشدون سنی قانه بویادی
**********
درده گتدی منی باشون یاراسی
جانوین جانیمه گلسون قاداسی
وار یئری گوز یاشمی قانه دونه
اولدی آغ سقللوین قان حناسی
**********
آچ گوزین باغریم اولوب قان باباجان
قان دولان گوزلره قربان بابا جان
آغلارام یاننام ئولونجه بو غمه
دردیوه اولمادی درمان بابا جان
**********
شاعر: احد عدلجو

/ 0 نظر / 47 بازدید