من گرگ هر دردوی سنین بولیدیم بولمدیم

زبانحال حضرت علی (ع) در غسل حضرت زهرا(س)

 

من گرگ هر  دردوی  سنین  بولیدیم  بولمدیم
من گرگ غسلون ویرن ساعت ئولیدیم ئولمدیم
ئولمدیم  قالدیم جنازون اوسته سینه داغلادیم
ئولمدیم ئوزاللریمله  گوزلروی  باغلادیم
دویمشام جانه داخی سنسیزجهانی نیلییم
قورخورام سندن صورا دنیاده چوخ عمر ایلیم
ئولمرم بوصبروطاقت که منیم  وار فاطمه
آچ گوزون سیندرما دوستوم،دشمنیم وارفاطمه
لکّه قان دوشموش گوزون آچ،یومما یاندیردون منی
آند اولا ئوزجانیوه زهرا اوتاندیردون منی
من نجه بو عشقیمون سر رشته سین سنلن قیریم
من نجه آخرسنی خاک  بقیعه  تاپشیریم
من نجه ئوز اللریملن جسموه خلعت بوکوم
من نجه سیلی گویردن صورته تپراق توکوم
من نجه سنسیز بو ایوده گوندوزی شام ایلرم
من نجه آغلارقالان اطفالی آرام ایلرم
دلخوشیدیم عمرومه سنلن سنی ئولدوردیلر
مین ایل عمرایتسم چتین بیرده یوزوم سنسیز گولر
ایتدیلرجبریل ئوپن درگاهی مقتل فاطمه
چوخ یورولمشدون بوآز عمرونده دینجل فاطمه
دینجل ای عمرینده راحت بالشه باش قویمیان
دینجل ای جاندان دویان اوغلی حسیندن دویمیان
 بوترابی  عیبی  یوخ تیره  ترابه ساتموسان
یات گجه لر یاتمیان زهرا نه راحت یاتموسان
اشگمیلن سو قارشدی آب غسل ایتدیم سنه
گوز یاشیم قانه دولاندی فاطمه سس ویر منه
سو توکور اسما  پریشان  ایلیور گیسولرون
وای منه زهرا نجه صدمه گوروب پهلولرون
بیلمورم  بومدتی بویاریه دوزدون نجه
سن حسینه الده بیر کوینک توخوردون چوخ گجه
بیلمدیم زهرا گینه چاره ایدردیم یاروه
چوخ اورکلندیم اوتاندیم باخماقا رخساروه
قاخمیوردی بیر الون روشندی بو مطلب منه
کاش دیوردی سینوینده یاره سین  زینب منه
یاروی گوردوم الیم  قوینومدا  قالدی  فاطمه
آچ گوزون باخ گور نجه حیدر قوجالدی فاطمه
ایلیوب الآن قرانلوقدا  حسینون  سینه چاک
عاجزم نیلیم اوشاقلارون ئوزین ایلور هلاک
زینبون گاهی گلورحاله گهی حالدان گیدور
مغسل اوسته  جسموه باخدقجا تزتز غش ایدور
نصف شبدی باشون اوسته اّول آخشامدان وارام
ایستورم  غسلون  ویرم کفن ایلیم تزقورتارام
غسلیدن ال ساخلارام فکر ایتمه حیدردینجلور
من یودوقجا ایندی مسمارین یریندن قان گلور
گوزلریمدن قان سوزور سینونده کی یارون کیمی
فاطمه آواره یم طفلان آوارون کیمی
کاش اجل الآن خلاص ایلیدی دنیادن منی
کور اولیدی گوزلریم بو حالدا گورمیدیم سنی
من نه حاله قالمیشام گویافقط زینب بولور
قالخزورخردا الین گوز یاشیمی یوزدن سیلور
وارقاباقدا آگهم  نه ماجرا سی زینبین
بیرده باشیندن آچیلماز باش قراسی زینبین
بوفلک قویماز قیزیم عمرینده لحظه دینجله
قوی سنه من غسل ایدیم زینبده اورگنسون هله
بیرگونی زینب دوشرشامه وطندن دور اولار
اوچ یاشندا بیر قیزا غسل ایتمگه  مجبوراولار
او قیزین سویلله زهرای سه ساله آدینه
هراونا زینب باخاندا سن دوشرسن یادینه
چون سنه چوخ اوخشیار چوخ نازیلن بسلر حسین
سسلین  وقته اونی دائم  ننه سسلرحسین
بیرگیجه سن تک آلار آز عمرونون پاداشنی
جان ویرنده سینه ده  ساخلار حسینون باشنی
او قیزا غسل ایلیلّر نصف شبده سن کیمی
دفنینه خاطرقالارآواره  زینب من کیمی
من سنه تاپدیم ولی  زینب  اونا تاپماز کفن
هیچ علاج اولماز قالار اگنینده کهنه پیرهن
من بقعیون  تپراقیندا جسمووه قیلام مزار
زینبیم ویرانه یرده اول قیزین  قبرین قازار
اللری گلمزقویا قبره رقیم  وای دئیر
یوزده سیلی رّدین ئوپدوقجه ننم لایلای دیئر
**********
شعراز: مهدی قلندری اردبیلی

ناله های مهدی

/ 2 نظر / 14 بازدید

مهدی قلندری اردبیلی

سعید

این شعر از مهدی قلندری کتاب ناله های مهدی