زبانحال نوعروس در غم حضرت قاسم(ع)

 

ای عم اوْغلی گتیروب دردوغمون جانه منی
سالوب آهو کیمی بودشت وْبیابانه منی
نه بولور سلسله‌ی عشقه دوشن عار ندور؟
جوربیگانه ندور؟ طعنه‌ی اغیار ندور؟
باخمارام دیروْکلیسا ندی، بازار ندور؟
گئد‌ر‌م جذبه‌ی عشقین چکه هر یانه منی
من عزیز‌م گر‌ک عالمده ئؤلم عز‌تیلن
هود‌ج تخت روانیم، چکیله حرمتیلن
ایندی هودج یرینه، اهل جفا ذلّتیلن
میندیروبدورباش آچیق، ناقه‌ی عریانه منی
نیزه باشنده باشون گون کیمی جولانه گلوب
نه تجلّادی تماشاسینه بیگانه گلوب
چکمیشم هرنه مصیبت بوچوروک جانه گلوب
ئؤلدورر ایندی ندیم طعنه‌ی بیگانه منی
من مریض غم عئشقم، منه تدبیرندور
زلف زنجیری بسیمدور، داخی زنجیرندور
بولمور‌م آتش آهیمده کی تأثیرندور
قوْیوب عالمده بونوعیله یانایانه منی
گتمر‌م شامه عم اوْغلی بویورآخر نئد‌ر‌م
معجریم یوْخسا یوزه زلفومی حایل ائده‌رم
آلمیشام گوشه‌ی ویرانه سراغین گئد‌ه ر‌م
خانه ویران ائده تا منزل ویرانه منی
نیز‌ده بیرجه دوْلان حال پریشانیمه باخ
دل پرآهیمه باخ، سینه‌ی سوزانیمه باخ
قاریشوبدور گؤزومون یاشی،جگرقانیمه باخ
نئجه گؤر غرق ائلیوب لاله صفت قانه منی
عقر‌ب زلفی قرین مه تابان ائله‌دین
من پریشانی عجب زاروپریشان ائله‌دین
سینه‌می ناوه‌ک مژگانیله شان شان ائله‌دین
ائیله‌دین خانه‌ی زنبوریله همخانه منی
اکیلوب آیینه‌ی حسنیوه کؤنلوم کیمی گَرد
دوزولوب عورت اوشاق، پیروْجوان وْ زن وْمرد
هامینون فکری بودور دردیمون اوسته قوْیا درد
گتیروب نی کیمی بودردوْغم افغانه منی
بوقد‌ر زولفیوی رخساره نقاب ائتمه‌گیلن
بوندان آرتوق منی، گَل خانه خراب ائتمه‌گیلن
قوْی جمالین گؤره شام اهلی، حجاب ائتمه‌گیلن
چون بولور قوم جفا، بوْش یئره دیوانه منی
آغلارام بزم مصیبتده، سنه تا ساغام
شهرتبریزیده صرّاف کیمی دوستاغام
نچه مدّتدی سنین درگَهیوه مشتاغام
ایسته حضّاریله بوقفه‌ی قربانی منه
**********
شاعر: مرحوم صرّاف