گفتگوی امام حسین با حضرت زینب در شهادت حضرت علی اصغر(ع)
 
گل باجی اصغریم قانه باتدی
امدی پیکانی مقصوده چاتدی
اوچ‌پر اوْخ چالدی لای‌لای بالاما
دینجه‌لیب اللریم اوسته یاتدی
من اوتاننام گله‌م خئیمه‌گاهه
گل باجی سن اؤزون وعده‌گاهه
گل گؤره‌ک نئیلییه‌ک بو بالانی
طا‌قتی چون الیمد‌ن آلانی
دفن ائده‌ک یا وئره‌ک بیز روبابه
گیزله‌ده‌ک یا کی بو ماجرانی
اصغری گؤرسه هئچ تاب ائده‌نمز
کربلاده ئؤلر دای گئده نمز
سن چاغیردین منی غملی خواهر
گل حسین جان وئریر تئشنه اصغر
آل روبابین بالاسین الیند‌ن
یوْرقون اوْلدی بوغمدیده مادر
غصه‌د‌ن گؤر نه حاله قالیبدی
اصغرین دردی دیلد‌ن سالیبدی
ال آیاق چوْخ چالوب آغلامیشدی
آغلیوب داغ-داشی داغلامیشدی
چنگ آتوب اؤز گؤزون پارچالاردی
اللرین مادری باغلامیشدی
چیرپنیب دوشمیشیدی نفسده‌ن
اینجیمیشدی اوْدور بو قفسده‌ن
آلتی گوشه بئشیک اشتیاقی
مست ائدیب آلتی آیلق قوْناغی
سینه‌می ائیلرم حشر اوْلونجا
اصغرین آلتی گوشه اوْتاغی
بو یارالی باجی من یارالی
سینمین خوْشدی اوْلسون مدالی
ایستی گون شدّتیله شاخاردی
اصغریم دیسگینیب چون باخاردی
ایستی سالمشدی حالدان بالامی
گاه باخوب گؤزلری گه آخاردی
نسگلی چوْخدی دلسیز بالانین
گل ائشیت ماجراسین بالانین
اصغرین گؤزلری هی سوزه‌ردی
قلبیمین ریشه‌سین لاپ اوزه‌ردی
آغلیا بیلمئیوردی عطشده‌ن
لب‌لرین مثل لاله بوزه‌ردی
اوْخ دگنده دوْداقلاری قاشدی
لب‌لری قالدی حلقی گل آشدی
پیکرینده باجی یوْخ یاراسی
یوْخدی حتّی دیسم چوْخ یاراسی
باورون یوْخدی گل باخ اؤزونده
وار بوْغازیندا بیر اوْخ یاراسی
حرمله چلّه‌سینده‌ن چیخیبدی
اوْخ دگیب گل ائویمی یخیبدی
اصغری اوْخ سالیب گؤر نه حاله
آسلانوبدی باشی مثل لاله
گؤردی من آغلیرام غیرتینده‌ن
گولدی هئچ ائتمه‌دی ذرّه ناله
سینه‌مه نخل ماتم اکیبدی
غئیرتی مُرتضایه چکیبدی
اوْ منه گولدی من چوْخ اوتاندیم
یاندیم اصغر جانی باجی یاندیم
گؤزلریم گؤرمه‌دی خئیمه‌گاهی
ساق-سوْلا قتلگهده دوْلاندیم
اصغریم قلبیمی چوْخ سیخیبدی
اکبرین دردی یاددان چیخیبدی
سسله‌دیم گل ابالفضل آماندی
وئرمه‌دی سس سسیمه یوباندی
چوْخ ادبلیدی سنکی بیلیرسن
قارداشیم اللرینده‌ن اوتاندی
صود امرده منی بوْشلئییبدی
کوسدی منده‌ن اوْخی خوْشلئیبدی
زحمتی وئردی آخر نتایج
سکّه‌سی عالمه اوْلدی رایج
کربلاده بیر ایش گؤردی اصغر
رُتبه‌سی اوْلدی باب‌الحوائج
کیم دخیل اوْلسا بو شیرخواره
دردینه ائیلیر فوری چاره
------
لا ادری