تیرخوردن حضرت علی اصغر(ع) 

 

پیکانی کمان اوسته،چون حرمله میندیردی
اصغرکی دانشمازدی،پیکان اوْنی دیندیردی
چکدی زهی گوشاگوش،دقّتله نشان ائتدی
شستیند‌ن اوْلوب آزاد،اوْخ بیر طَیَران ائتدی
سرعتله نشانگاهه چسب اوْلدی مکان ائتدی
آغوش امامتده ناحقّ یئره قان ائتدی
پیغمبری آغلاتدی سفیانی سویندیردی
یاقوت درخشانون آویزینی سیندیردی
قوْنداغون آچوب آتدی توْپراغه بوروندوردی
پیمانی علی اصغر قانیله ائدیب امضاء
ضبط اوْلدی همان پیمان محشرده اوْلا اجراء
تأثیردعا قوْیدی بوقاندا حق یکتا
اوْل طفلی حسینیند‌ن معناده آلوب زهراء
بیرحوری زیبایه عطشان بالانی وئردی
قانلی لچگین آچدی،جنّتده سوْیوندوردی
کوثرده وئروب غسلین دیبایه گییندوردی
قیلدی عطشین ساکت تا شربت کوثرده‌ن
نهرلبن آرایش تاپدی،لب اصغرده‌ن
مقصوده یئتوب اصغرآیریلمادی اکبرده‌ن
شاه شُهدا باخدی، اطرافینه کج گردن
گؤردی اوْنی میداندا بیریاده سالان یوْخدور
انصاروْمهاجرد‌ن بیرزنده قالان یوْخدی
اوْل طفلی قوجاغنده‌ن ظاهرده آلایوْخدور
گؤردی گؤزونی یومدی اصغر بالاسی یاتدی
اؤپدی قوری لبلرد‌ن عالملری آغلاتدی
قیتردی قوجاغندا تا خیمه‌لره چاتدی
اوْوجندا دوتوب قانون افلاکه طرف آتدی
توْپراغه تؤکولسیدی اصغر قانی دورمازدی
خیمه دالنا کئچدی شمشیریله یئرقازدی
دفن ائتدی اوْمظلومی اوستنده آدون یازدی
سسلندی باجی زینب ای محنته آلوده
اوْلدی یوخوسوزلقدان اصغر بالام آسوده
وئردیم اوْنی من تحویل بیر حالیله معبوده
قربانلاری ختم ائتدیم،یئتدیم باجی مقصوده
اوْل سود امری قوْیدوم قبره ائلدیم راحت
گئت خئیمده یا زینب گهواره‌سینی گیزلت
بیچاره آناسندان تا قوْیما چکیم خجلت
سسلندی خانم زینب قارداش سسیوه قربان
چخدی چؤله چادرد‌ن گؤردی دایانوب سلطان
بیرقسمت عَباسینده وار تازه تؤکلموش قان
هم اللری اوْل شاهین قانیله اوْلوب الوان
عرض ائتدی هانی قارداش بس تشنه جگراصغر
سوایچماقا ائتمیشدی میدانه سفراصغر
یوْخ ایندی قوجاغندا گؤرر‌م سود امراصغر
قارداش بونه عالمدوراوستونده بونه قاندور
هاردان تؤکلوبدوربوقان اللرون الواندور
شرمندلیق آثاری حالوندا نمایاندور
سوایچدی بالام اصغریا اینکه لب عطشاندور
حضرت اوْدل‌افکاره ابرازجواب ائتدی
دنیا غمینی اصغر تسلیم رباب ائتدی
آغوش شهادتده حشره کیمی خواب ائتدی
عطشان بالاما دوشمن سووئرمدی قان وئردی
رمزیله سویون رنگین دریاده نشان وئردی
اوچ شعبه‌لی پیکانه حلقینده مکان وئردی
قوش تک قانادون چالدی،قوْنداقنا جان وئردی
سسلندی خانم زینب ای غنچه تریم لایلای
یاتمازدون عجب یاتدون ای سود امریم لایلای
یانموش دلیوه اصغریاندی جگریم لایلای
*********
شاعر:مرحوم یحیوی