استمداد حضرت ابوالفضل از امام حسین(ع)

 

گؤز تیکیبدیر سنه قارداش، دم خنجر ده باشیم
تئز یئتیش دادیمه قوْیما، قالا اللّر‌ده باشیم
-----------------
منه مین یاره دَگه، ائتمر‌م البته گیله
قوْلسوز اوْلسامدا چتین دوشمنه باشیم اگیله
قلبیمین نذریدی بوباش قاباغیندا کسیله
گل ائده حاجت قلبیمی، برآورده باشیم
---------------
گر گولون شاخه‌سی صدمه گؤره، خوْش رنگی سوْلا
نه قد‌ر دوز دوتاسان، گول آخینار ساغا سوْلا
منه ده صدمه یئتیب، سیّدی! باشون ساغ اوْلا
قالموری شاخه سینان گول کیمی پیکر‌ده باشیم
-----------------
دئمیره‌م قارداشیوام، عرصه ده سرلشگریوم
یا الیمده عَلمیم واردی عَلم پروریوم
منده گر سلطنت عالم اوْلا نوکریوم
خاکبوس اولمیوب اوْلماز دردیگر ده باشیم
----------------
سن بولورسن، سنه قارداش دئمه‌دیم اؤز باشیما
امرزهرادی کی زحمت وئرور‌م قارداشیما
گل آیاقوندان اؤپوم قوْی الون السیز باشیما
اوْلا تا آخرعمرینده نظرکرده باشیم
-----------------
تاپدیم اوْل گونکی ولادت من ایا شاه زمن
اؤز قوجاغوندا گؤز آچدیم، گل رخساریوه من
نوْلا ایندی یومولان وقته گؤزوم سن گله‌سن
عرشه ناز ایلییر‌ اوْل دامن اطهر ده باشیم
----------------
گل خجل ائیله‌دی دونیا سویی، سرلشگریوی
سربلند ایله سرافکنده اوْلان نوکریوی
جان دوْداغیمدادی، پیشواز ائیلیر لبلریوی
ایستیر عمرین وئره باشه، لب کوثرده باشیم
----------------
من هُمای شرفم، حیف سینیب بال وپریم
نه الیم وار نه عمودیم، نه بیر آیری کَسه‌ریم
کاسه سر، کُلَه جنگیدی، سینه‌م سیپریم
ایستیر‌م دهریده سرمشق اوْلا هر فرده باشیم
-----------------
گرچه ذبح اوْلماغا باشیم قاباغیندا تله‌سَر
خنجرقاتل اسه‌نده اوْدا شوقیند‌ن اَسَر
وار نه جلّادیده جرأت، نه ده خنجر ده کسَر
باخما السیزدی چتین ال وئره نامرده باشیم
------------
راضییم قاتل بی رحم ائله سنگین دل اوْلا
پرده‌لی بیر طبق ایچره باشیما حامل اوْلا
قالا بیر حاله باشیم، قان گؤزومه حایل اوْلا
گؤرمییه زینبی اغیار آرا بی‌پرده باشیم
------------
قورولان وقته حسین! محکمه‌ی عدل وْ جزا‌
هر شهید اؤز باشی الده گله‌جاق حشره اخا
بیر شهید السیز اگر اوْلسا، ندور چاره شها
من نه نوعی اله آللام صف محشرده باشیم
-------------
مرحوم منزوی