زبانحال امام حسین برسرنعش برادر

 

اوْخلانوب ندن سومشگین
پیکرونده قان اباالفضل
یاتما ایستی گونده قوْلسوز
آچ گؤزون اوْیان اباالفضل
قوْی باشون دیز اوسته قارداش
ایستی گون یاران نه چوْخدور
ظلمیله سالوبلا عریان
پیکرون سراسر اوْخدور
سرنگون الم سومشگین
قوْللارون بدنده یوْخدور
چشمه،چشمه هرطرفدن
قان اوْلور روان اباالفضل
داغ اکبریم براد‌ر
ایلیوب منی جگرسوز
دؤره می آلوبدی لشگر
گؤردیلر منی اوْغولسوز
رحم ائله من غریبه
دشمن ایچره قوْیما یالقوز
ساغ دگول هرایه گلسین
اکبرجوان اباالفضل
دشت کربلاده سنسیز
سیندی لنگرسفینه
اوستومه ایاق گتوردی
گؤر نئجه بواهل کینه
گؤز یوْلا تیکیبدی تشنه
گؤزلوری یوْلون سکینه
خیملرده آل حیدر
ایلیور فغان اباالفضل
بیر سنه گلور گمانیم
رحم قیل وفالی سردار
لشگر‌یم داغیلدی یکسر
قاسم وْنه اکبریم وار
یالقوزام، قوْیوب گئدیرسن
کیم اوْلور منه علمدار
من غریبه داغ هجرین
اوْلدی چوْخ یامان اباالفضل
قالدی آرزوم اوْلییدی
قوْللارون بد‌نده قارداش
بیرجه قوْل بوْیون اوْلایدیم
گؤزلریم تؤکییدی قانیاش
گئتدی طاقتیم الیمده‌ن
آچ گؤزون وفالی قارداش
گؤرنئجه ائدوب فراقین
قدّیمی کمان اباالفضل
کربلاده قوْیما یالقوز
چوْخدی دشمنیم برادر
الده تیروْتیغ وْ خنجر
قتلیمه چکیبله یکسر
لشگریم داغیلدی قـارداش
یوْخدی بیر معین وْیاو‌ر
زینبی اسیر ائدللر
قوْم کوفیان اباالفضل
آغلارم سنی الیمده‌ن
آلدی ظلمیله زمانه
دشت کربلاده سنسیز
دؤندی قامتیم کمانه
قوْم دون ائدللر ایندی
اوْخلاری منه نشانه
آز قالوب وئره‌م سنین تک
منده تشنه جان اباالفضل
فرقتینده یوْخدی تابیم
اوْج ائدر سمایه آهیم
اؤلدی یاوریم داغیلدی
لشگریم پوْزولدی جاهیم
تئشنه لب شهید ائدللر
یاندیراللاخیمه‌گاهیم
ایندی آز قالیب دوزولسین
شامه کاروان اباالفضل
شام شوم محنتینده‌ن
چکمه گل بیانه ذاکر
چون بیان دردوْغمده
اوْد سالور جهانه ذاکر
غربت اؤلکه درد الینده‌ن
گلمه چوْخ فغانه ذاکر
ایسته سنده درده درمان
ائیله‌سون نهان اباالفضل
-------
ذاکر مراغه ای