گفتگوی حضرت رقیه(س)با حضرت زینب(س)

 

اى عمّه منیم کاش ائله امکانیم اولیدى
سینمده بو باش، بیر گئجه مهمانیم اولیدى
**********
اى کاش بونون ذکرینى بیر آن اشیدیدیم
بو قانلی دوداقدان گئنه قرآن اشیدیدیـم
هردم بابا جانیم چاغریب،جان اشیدیدیم
قربان بابامین جان سسینه جانیم اولیدى
**********
اوّلده گرک باوریمى محکم ائدیدیم
پیشوازه قاچوب گوزلریمى پُر نم ائدیدیم
گوز یاشلاریمی جمع ائلییب مرهم ائدیدیم
الده یارالى لبلره درمانیم اولیدى
**********
بولسیدیم اگر، اشکیمى یوللاره سپردیم
گلسیدى ایاقیله ایاق ردّین ئوپردیم
 فرشیم یوخودی زلفومی توپراقه دوشردیم
ویرانه ائویم لایق مهمانیم اولیدى
**********
دوتدی بوگئجه اوّل شبدن منى غفلت
گوى اهلینى دعوت ائلیم اولمادى فرصت
دوتسیدیم عزا من بو باشین شأنینه نسبت
جبریل گرک بو گئجه دربانیم اولیدى
**********
چوخ وئردی منه زجر، دنی گوز یاشا خاطر
سرنیزه ده دورموشدی بو باش یولداشا خاطر
آللاه منی حفظ ائتدی فقط بو باشا خاطر
عشقیمده رضا اولمادی، نقصانیم اولیدی
**********
آخرده یتوب،چوب جفا دست یزیده
ووردی اونی غیظیله لب لعل شهیده
زینب بی‌بی‌مین قدّین اَگوب ائتدی خمیده
هیچ بیر دئمدی یاخشیدی وجدانیم اولیدی
**********
شاعر : استاد منزوی اردبیلی