زبانحال حضرت علی

 

ای ناز ائلیین سینه‌ی پیغمبره زهرا
بند دل طاها
دیداریمیزی قوْیدی فلک محشره زهرا
یانسین بئله دنیا
**********
دنیا سنیلن ترسه مدار اوسته دوْلاندی
ظلمینده دایاندی
شیخین دغا حرمتیوی حقّیوی داندی
نه مندن اوتاندی
اوْد ووردی عدو درگه اجلالیوه یاندی
سینن یارالاندی
توش ائتدی گؤز‌ل دامنیوی آذره زهرا
یانسون بئله دنیا
**********
غرق ائتدی سنی محنته توفان اؤز ائوینده
عدوان اؤز ائوینده
اطفالون اوْلوب قوش کیمی ویلان اؤز ائوینده
نالان اؤز ائوینده
سینه‌ن یاراسی اوْلمادی درمان اؤز ائوینده
لقمان اؤز ائوینده
وئرمیبدی امان دست قضا حیدره زهرا
یانسون بئله دنیا
**********
سن همّتیله دوْقّوز ایل اوْلدون منه غمخوار
ای یاروفادار
چنگال ستم ائتدی سنی درده گرفتار
دلخسته وْ بیمار
چکدین شرر هجریله چوْخ سینمه داغلار
قوْیدون منی آغلار
آیدین سحریم دؤندی منیم محشره زهرا
یانسون بئله دنیا
**********
ظلم اهلی سالوب خرمن آمالیوی ناره
قوْزاندی شراره
ثانی سنی ووردوقجا علی ائتدی نظاره
باخ صبروْقراره
نسگل بودی قوْیدوم سنی گیزلینده مزاره
پهلولری یاره
باخدیم نگران تئز یومولان گؤزلره زهرا
یانسون بئله دنیا
**********
قوْیدی سنی دنیای دنی خوْش گونه حسر‌ت
یات قبریده راحت
عفو ائیله منی ساخلامادیم یاخچی امانت
وارمنده خجالت
باغلار سینوین یار‌سینی ختم رسالت
ای لاله‌‌ی جنّت
خالق یتیر‌ر قاتیلیوی کیفره زهرا
یانسون بئله دنیا
**********
لاادری