احوالات روز عاشورا

 

نجه قان آغلاماسین داش بوگون
کسیلوب یتمیش ایکی باش بوگون
تؤکولوب توْپراقا باشسیز شهدا
کربلا دشتی اوْلوب کوه منا
موج اید‌ر قانیله دریای بلا
نجه قان آغلاماسین داش بوگون
بوهمان گوندی باتیب یاسه جهان
بوْیانوب قانه سوسوز پیروْجوان
انبیالر باش آچوب آغلیری قان
نجه قان آغلاماسین داش بوگون
بوهمان گوندی سوْلوب دین چمنی
سارالوب سرووْگل وْیاسمنی
قطعه قطعه اوْلوب اکبر بد‌نی
نجه قان آغلاماسین داش بوگون
وئردی لیلایه خبر شاه زمن
اکبرون گلدی، گل ای کان محن
بیر عبانین دوْلوسی قانلی بدن
نجه قان آغلاماسین داش بوگون
توْی دوتوب قاسمه شاهنشه دین
اتدیلر بزم عزا حجله‌گهین
یاخدی قانیله حنا تازه گلین
نجه قان آغلاماسین داش بوگون
نجه توْی ناله سماواته سالیب
ناله داماد آناسندان اوجالیب
بد‌نی آتلار آیاغندا قالیب
نجه قان آغلاماسین داش بو گون
حرمله آلدی اله تیروْکمان
اصغرین حلقین ایدوب تیره نشان
ایچدیریب سویرینه قرمزی قان
نجه قان آغلاماسین داش بوگون
کسدی اشراردنی سویوْلونی
تشنه سقّانون آلوب ساغ سوْلونی
هم ساغین سالدیلار هم سوْل قوْلونی
نجه قان آغلاماسین داش بوگون
سالدی دنیایه شرر شمردَنی
کسدی عطشان سرشاه زَمَنی
قالدی باشسیز قوری یرده بدنی
نجه قان آغلاماسین داش بوگون
سنده صحّاف ائله شوْروْفغان
مَطلَبون تا وئره خلّاق جهان
بوگؤز‌ل مطلعی قیل بیرده بیان
نجه قان آغلاماسین داش بوگون
-------------
شعراز:  صحّاف تبریزی