زبانحال حضرت زینب در ورود بکوفه

 

نیزه ده قارداش باشون ائیلور تجلّی زینبه
گؤسترور هر جلوه‌سینده مین تسلّی زینبه
----------
پرتو انوارحقدن، نوک نیزه طوریدی
طوریده موسانی حیر‌تده قوْیان بو نوریدی
لفظ ارنی دن کلیمه، نورحقّ منظوریدی
لَن تَرانی سؤیلین اوْلموش هویدا زینبه
----------
نیزده باشون گؤر‌ن ای مظهرحیّ ودود
سؤیلدی عیسادی بو داره چکیب قوم یهود
شعله آهیله وئرسه، مشعل خورشیده دود
وار یئری دؤردومجی گون ید باخسا عیسی زینبه
----------
ای هلالی زینبون ای صورتی بدرتمام
ائلمیشدون بوگئجه یوْخسا کول اوستونده مقام
تازه آی تک گؤستریللر، بیربیرینه خاص وْ عام
باشوه خلق ائیلیر ایماء، باشون اَیمه زینبه
----------
تئز گلیدین پیشوازه سن گرک قالدون گئجه
قالمیشام حیرتده من، بیلمم گونوزدور یا گئجه
گون ندوراوْلسا گجه، گوندوزدی چخمیش آی نئجه
اوْلسا گر گوندوز ایدوب، غم لیل یلدا زینبه
----------
ای هدایت اهلینه مصباح ذات ذوالمنن
تا دئیوم نه چکمیشم شام غریبانینده من
روشن ائتمیشدون گئجه خلو‌تگه اغیاری سن
بیر قرانلیق خئیمه اوْلموشدی مصلّا زینبه
----------
ایمدی تبلیغات ایدیردیم خلقه اصل مذهبی
تا سسون گلدی گلوگیر ائتدی غصّه زینبی
سن دانیش زینب دیلون قربانی آندیر مطلبی
خارجی آد قوْیماسون بو قوم اعدا زینبه
----------
ایله محو ائتدون منی بیر جلوه دیداریوه
اؤزلقیمدا‌ن خارج ائتدون مجمع اغیاریوه
باشون آردنجا دوْلانّام، کوچه وْبازاریده
عالم عشقونده خوْشدور هر بلایا زینبه
----------
هاشمیّانه آچوبلار ظلم الین اهل جفا
گه دؤگوللر قزلارون، گاهی دیوللرناسزا
بیر نفر یوْخ دادرس، ناچار ائدوللر التجا
گه رقیه گه سکینه گاه لیلا زینبه
---------
شاعر: مرحوم حسینی سعدی زمان