اربعین حسینی_زبانحال حضرت زینب(س)

 

دور اى وفالى قارداشیم زینبون گلدى
کرببلالى قارداشیم زینبون گلدى
**********
اى نور چشم مصطفى آچ گؤزون قارداش
جان عزیز مرتضى آچ گؤزون قارداش
پرورده‏ى خیر النّسا آچ گؤزون قارداش
پوزقون جلالى قارداشیم زینبون گلدى
**********
احوالیمى دور آل خبر باغریقانم من
یوللار یوروبدور جانیمى خسته جانم من
دیندیر بو غملى زینبى میهمانم من
آه اى وفالى قارداشیم زینبون گلدى
**********
اى رهبر عشقیم منى پیشواز ائله
دور بو سفیر نهضتون سرفراز ائله
قارداش باجونلان بیر دانیش کشف راز ائله
باشى بلالى قارداشیم زینبون گلدى
**********
پاتخت ظلمه ولوله سالدیم آى قارداش
الله بیلور زنده نجه قالدیم آى قارداش
اول دورت مین‏اوخلى‏کوینگون آلدیم‏آى‏قارداش
چوخدور مقالى قارداشیم زینبون گلدى
**********
اى کعبه‏ى شش گوشه‏سى قبله‏ى آمال
یاتما کفنسیز قبریده چوخ پریشانحال
دور دورت مین اوخلى کوینگون زینبوندن آل
ائلدن آرالى قارداشیم زینبون گلدى
**********
اى شهریار شهر غم گلدى مهمانون
قید اسارتدن رها اولدى طفلانون
گلدى باجون زینب اولا مرثیه‏خوانون
قلبى یارالى قارداشیم زینبون گلدى
**********
قان آغلادیم قارداش حسین کوفدن شامه
عشقونله اوردا باشلادیم اؤزگه هنگامه
تنگ ایلدیم بو عالمى چشم ظلاّمه
زهرا مثالى قارداشیم زینبون گلدى
**********
قانه سرشگیم قاتدیلار دؤزدوم آى قارداش
قیزلاروى آغلاتدیلار دؤزدوم آى قارداش
کول سپدیلر، داش آتدیلار دؤزدوم آى قارداش
آرتدى ملالى قارداشیم زینبون گلدى
**********
چوخ غصّه چکدیم قالمیشام لیک پاینده
بیر غم ولى بو زینبى ائتدى شرمنده
ئولدى رقیّه اولموشام من سرافکنده
پوزقوندى حالى قارداشیم زینبون گلدى
**********
شاعر: علیرضا حضرتی «حبیب»