ورود بکربلا_ گفتگوی امام حسین(ع)با حضرت زینب(س)

 

بوبلا چؤلی، حسینه ابدی وطندی زینب
آغاران ساچون بوچؤلده، من اوچون کفندی زینب
**********
من اوچون خبر وئریبدور بویئری بابام پیمبر
دئیوب آدلارون باشیمدا اوْلاجاق نچه دلاور
آنادان اوْلان گونومده منه آغلایوب اوْ سرور
بویوروب هایاندی قبریم، کفنیم ند‌ندی زینب
**********
بو چؤله بابام علی‌نین اوْ زمان دوشوب گذاری
گؤتوروبدی توْپراقندان، ائدوب اشک چشمی جاری
بویوروب حسین قانیله، اوْلی بو یرآبیاری
اوْدی مو به مو قضیّه، من اوچون عَلَندی زینب
**********
ائله کی سواردی قانیم اوْلی کیمیا بوتُربت
کَفنینده کیم گتیرسه، اوْنی قبره وقت رحلت
ملک عذاب گؤرسه، قیدوب گئد‌ر خجالت
یوزی آغ دی کیم بوعشقین، اوْلا پایبندی زینب
**********
چاغراندا اکبریملن منی بومنای اعظم
باخوب آغلادی دالمجا، باجی چشم آب زمزم
دئدی گئتمه بی‌وفادن یوزی قاره نهرعلقم
ولی نیلیوم بو امرحقّ ذوالمنندی زینب
**********
بورا کعبه‌ی ولادیر، واریدیر گؤزل رَویّه
نه نماز دست بسته، نه دعای با تقیّه
بوچوخور یره نظرگاه، اوْلی تلّ زینبیّه
باخان عرض ائدر خدایا، نجه شیرزن دی زینب
**********
کیمه قبرون اوْلسا گیزلین، ائده جاق یقین سراغین
سنی آختاران گره‌کدور، ئؤپه کربلا رواقین
آلاجاق گولون اؤز عطرین، اگر اییله‌سه بوداغین
بوله‌جاق سنینده روحون منه هموطن‌دی زینب
**********
منی کیم زیارت ائدسه، تاپاجاق ره اصولی
ائله بول ائدیب زیارت نئچه یوْل بابام رسولی
وئره کیم قسم سنینده آدیوا آنام بتولی
تاپاجاق شفا آدینلا، دل دردمندی زینب
**********
دئیه سن بابام ووراردی اوجا یرده خیمه‌گاهی
اوْنا بنزه‌مز حسینین پوْزولان جلال وْجاهی
نئیله‌سین اوْ شه کی یتمیش ایکی فرددیر سپاهی
هله بوآز عدّ‌نینده بیری سود امندی زینب
**********
سنه ای بتول ثانی نه زماندی نوکرم من
نقد‌ر اوجالسا شأنیم گینه منزوی ‌ترم من
اوْلا کربلا نصیبیم رفقانی سسلر‌م من
دییر‌م بو تلّین اوستون الی باشدا اندی زینب
**********
شاعر: استاد رحیم منزوی اردبیلی