غدیرخم

 

آلدى پیمان ایکّى گونده خلقیدن ربّ قدیر
بیر گونون آدى «الست» و بیر گونون آدى «غدیر»
اوّلین گون سؤیلدى آیا سیزین آللاهیزام؟
عرض ائدیب یکسر «بلى» مرد و زن و خرد و کبیر
ایکّمینجى گون آلوب پیمان ولایت عشقینه
تا بولونسون خلقه کیمدور حیدر اول شیر دلیر
امر ائدوب پیغمبره اعلان ائله بو مطلبى
تا غدیر خم چؤلونده داستان اولسون شهیر
گر بو نقشى ائتمه‏سن ایفا رسالت نقص اولار
چوخ اهمّیتلى ایشدور چوخ مهمّ و چوخ خطیر
یاخشى فرصتدور بو گون اتمام اولوب حجّ وداع
حجّةالاسلامیده شرکت ائدوب خلق کثیر
ییغ هامى انصاریوى اصحابیوى سن بیر یئره
امر ائله اوردا قورولسون منبر و تخت و سریر
چیخ او منبر اوستونه چک مرتضانى یانیوه
آشکارا بلکه گؤرسونلر سیزى جمّ غفیر
ساغ الینله سول الین قووزا گؤیه یامصطفا!
من سنه ذرّ عالمینده حیدرى ائتدیم وزیر
سؤیله،اى مردم بولون آگاه اولون مندن سورا
هر کیمه مولائیدیم من، بو على اولدى امیر
ائتدى اجرا امر حىّ داورى ختم رُسُل
گؤیلره دوتدو یوزون عرض ائتدى اول روشن ضمیر
دوشمنون دشمن علینون،دوْسلارین دوْست دوت خدا
مضمحل ائت دشمنین، احبابینه سن اول نصیر
خاضعانه دوردی صفده دوست و دشمن یکسره
ائتدیلر بیعت امیرالمؤمنینه بیر به بیر
اوّل و ثانى ازلده باغلیوب پیمان، ولى
سیندیروبلار عهدى اوّلده او مردان شریر
مرتضانى ائتدیلر ییرمى بئش ایل خانه‏نشین
قلبنى قان، حقّینى غصب ایلدى اهل سعیر
الغرض تا شیر حقّین منصبى اولدی بیان
چوخ حسود و منکرین قلبینه دگدى اوندا تیر
کینه دیرینه‏سین «حرث بن نعمان» ائتدى فاش
عرض ائدیبدى اى رسول بى‏عدیل و بى‏نظیر
سن بویوردون کى امیریزدى على مندن سورا
اؤز سؤزوندور یا کى امر خالق حىّ کبیر؟!
ائتدى فرمایش جوابینده رسول مصطفا
من اؤزوم یوخ، انتخاب ائتدى خداوند خبیر
قهریلن «حرث بن نعمان» سسلدى گر دؤزدو سؤز
یوللاسین آللاه منه گؤیدن عذابین ناگزیر
گلدى گویدن ناگهان بیر داش دوشوبدور باشینه
چیخدى جانى، یکسره دشمنلر اولدو سر به زیر
دهریده کیم منکر اولسا بو ولایت امرینه
حشریده اولماز اونا راه نجات و دستگیر
شیعه اثناعشر هیچ یئرده قالماز چاره‏سیز
شیر یزدان شاه مردان چون اولار یار و ظهیر
شیعه‏لر سندن بوگون بایراملیق ایستر یاعلى
تهنیت عرض ائیلیور عشّاقیوه «سیّد بشیر»
**********
شاعر : سیّدبشیر