شهادت امام محمدباقر(ع)_مقتل

 

ائمّه گلشن عالمده تک به تک  گولدور
امام باقره فکریم ولی توسل دور
قلمده بیر جریان رموز وحدته باخ
مجازیدن گوتور ال ای گوزوم حقیقته باخ
حقیقت اهلی حقیقت امام باقردور
حقیقت اوسته اونا یوز ویرن مصیبته باخ
گوروبدی محنت زندان مصیبت غربت
او قلب عالم امکاندا صبر وطاقته باخ
آپاردی شامیده هشّام ایلدی محبوس
نجه گیدوب دیمورم ماجرای رجعته باخ
یتیشدی هریره گوردی اذیّت وآزار
غریبه باخ غم واندوه ودردغربته باخ
گلوب مدینه ده بیر مدت اولدی خانه نشین
نه بیرگلوب نه گیدن ابتلای وحدته باخ
امامی قویمادی دور زمانه آسوده
اونا عم اوغلوسی زید ایلیین اذیّته باخ
نقدر جور وجفا زید ایدوب او مظلومه
دینمورم او دنی طبعیده رزالته باخ
امامت اوسته امامیله باغلادی کینه
زهی عجب آرالیقدا اولان قرابته باخ
امام قتلینه ایتدی خلیفه نی مجبور
او بی مروّت ایدن فعله باخ سعایته باخ
خیال ایدوب ایده زهرا چراغینی خاموش
او کور دیلده گوگول خانه سینده ظلمته باخ
درست ایلدی بیر زین اسب او بی ایمان
سوواردی زهریله اول شوم کینه فطرته باخ
او زهر ایلدی تاثیر حجت اللهه
پوزولدی حالتی بیر انکسار حالته باخ
همان او حالیله پیغمبر اوغلی جان ویردی
شهید ایدن ئوز امامین وفاسیز امّته باخ
امام جعفرصادق ویروب آتاسینا غسل
کفن ایدوبدی مزاره قویوب جلالته باخ
بودور شریعت پیغمبر ئولسه هر مسلم
ایدلله غسل وکفن بوگوزل شریعته باخ
جوان اوغول نه گوزلدور آتانی قبره قویا
نقیض مطلبه باخ کربلاده محنته باخ
حسینون اکبری ئولموشدی کیم ایدیدی کفن
قوری یر اوسته قالوب جسم پاکی حسرته باخ
بدن یارالی، قوری یر، جنازه سی عریان
او پاک جسمیده باشدان باشا جراحته باخ
ووروبلا گون کیمی باشین جدایه اهل جفا
بلالی زینبه محشردی، بیر قیامته باخ
دیمه اولونمادی مظلوم امامه غسل و کفن
کُتُب ده معتبر اخباره باخ، روایته باخ
ویروبله قانیله غسلین عزیز زهرانون
حُنوط جسم شریفینده قانلی تربته باخ
اَلنلر ایچره حسینون بیر امتیازیده وار
سوالون اولسا جوابینده طرز صحبته باخ
بو رسمیدور اُلنه اوچ کفن اولور امّا
حسینه بِش کفن اولدی، جلال و عزّته باخ
یارالاریندان آخان لخته قاندی بیر کفنی
ایکیمجیسی خس و خاشاک اولوبدی، خلعته باخ
امان اوچومجی کفندن که ایتدی سُمّ خُیول
اوزی دیوب سَحَقونی، همان عبارته باخ
مُخدّراتین اولوب زلفی دوردومونجی کفن
جنازه اوسته عیال شه ولایته باخ
مُحجّبات پریشان ایدوبله زلفلرین
ایدولّه جسم حسینه کفن، محبّته باخ
ندور بِشیمجی کفن، شرحینه حیا ایدورم
گَلوب آتانی اوغول دفن ایده، او ساعته باخ
آتا جنازه سینه بیر حصیر چولقالادی
وجوده باخ، کفنه باخ، او کانِ رافته باخ
ایدوب آتا اَیاقی آتدا دفن قارداشینی
یاتوب آتا بالا بیر یرده، خوش فراغته باخ
طواف مرقد شش گوشه بیرده اولسا نصیب
«حسینی» ایله دعا، صدقیله اجابته باخ
**********
شاعر: استاد حسینی سعدی زمان علیه الرحمه
چهارده معصوم حسینی
صفحه 238 تا 241