زبانحال حضرت زینب(س) در11محرم

 

یارالار سینوْنده قارداش، گل وگلستانه بنزر
آغاریب منیمده زلفوم، چمن خزانه بنزر
نجه شرح ائدیم برادر باشیمون مصیبتیندن
کی گؤروندی بیر نمونه بشرین قیامتیندن
نچه ساعتین ایچینده، غم وْجور شدّتیندن
باجیون رشیده قدّی، اگیلیب کمانه بنزر
نئجه زینبون رضادور، سنی یاندیرا حرارت
بوله سن کی سایبانه، یوْخ الیمده استطاعت
بومکاندا دودآهیم، ائلییر منه حمایت
کسر ایستینین قاباغین، سنه سایبانه بنزر
بوجنازه‌لر کی باشسیز تؤکولوبدی ریگزاره
نه جلالیلن سالوبلار، سنی دوره‌دن حصاره
اوْلارین باشی جداده، دوزولوبدی چون ستاره
وَسَطینده قانلی باشین منه آسمانه بنز‌ر
سن اوشاقیدون، اؤپردی اوره‌گین بابام پیمبر
بویره دییردی بیر گون دَیجاق یارا مکرّر
گؤرورم دگیب کئچیب اوْخ، سوْرا سانجیلیبدی خنجر
بو یارا بابام محمّد، دئدیقی نشانه بنزر
جگروندا وار حسین جان، علی اکبرین یاراسی
اوره‌گین قانیلا سیراب، اوْلور هرزامان بناسی
دوشجَاقدی شرق وْغریه، اوْ یارانین انجلاسی
تروْتازه دور همیشه، گل ارغوانه بنز‌ر
اوْ زمان گؤر‌نده شمرین قانا خنجری بوْیانمیش
حَرمون، باجون، کنیزون، باشوا گلیب دوْلانمیش
قاچاقاچدا بو مکانه اوْ قدر آیاق توْخانمیش
کی کنارقتلگاهون، ره کاروانه بنزر
بالاجا قیزون رقیّه، اوْ عزیزه نازدانه
دوْلانوبدی آت دؤشونده، اوره‌گی دؤنوبدی قانه
یوزونه دَگیبدی سیلی، باشی اوسته تازیانه
سارالیب سوْلوبدی رنگی، ساری زعفرانه بنز‌ر
سن ای آفتاب عزّت، ائله نیزه‌دن نظاره
نجه گؤره بیزه ایشیق گون، گئجه تک اوْلوبدی قاره
هامی اَختَران عصمت، دوزولوبدی بیر قطاره
ره قبله‌نین دلیلی، صف کهکشانه بنزر
اوره‌گیم باشین آلاندا، غم وْمحنتون سحابی
اوْ بولور عزالیام من، یوزومه سپر گلابی
تؤکولور سرشگ چشمیم، یره ایسلادیر ترابی
گؤزومون یاشی آخاندا، مژه ناودانه بنزر
گز‌رم بو گلستاندا، گولونی صفالی گؤررم
آچیلان گولون ایچینده، دوزولن تیکانی درر‌م
قطرات اشگیمیله ؛گله گلشنه سو وئررم
گؤره‌سن وفالی زینب، نجه باغبانه بنزر
دل((یحیوی)) ده دائم اوْلی جلوه‌گر بو نیّت
گینه بیر گئجه جمالون یوخودا ائده زیارت
بوله سن کی آشیانی نه قد‌ر تاپار شرافت
دوْلانیر سرای مسکین، اوْ گئجه جنانه بنزر
-------
شعراز : مرحوم یحیوی