حلول ماه محرم

 

ای شیعه حسینون گینه باشلاندی عزاسی
بو غمده تؤکر گؤزیاشی رخساره آناسی
**********
عشق اهلی گئیوب قاره اورکلرده الم وار
آغلور هامی گؤز یاشی تؤکور محنت و غم وار
هر یئرده غم آثاریدی بیر قاره علم وار
وار علّتی یاغمور کیمی غم اوسته یاغیر غم
ذی‌حجّه چیخوب تازه‌لنوب ماه محرم
**********
بو غمده حسینی‌لرین هر آن گؤزی آغلار
دیللرده حسین وای اولی هردم سؤزی آغلار
باشینده قرا حضرت زهرا اؤزی آغلار
جنّتده قوروب اوغلونا بیر مجلس ماتم
گؤز یاشی تؤکر حضرت پیغمبرخاتم
**********
بو آی دوشوب ای شیعه حسین باشی بلایه
بو آی یری وار کون ومکان گلسه نوایه
مهمان چاغیریبلار او شهی کرب وبلایه
چوخ نامه یازوب کوفه‌لیلر دعوت ائدیبلر
مهمان چاغیرانلار نئجه گؤر حرمت ائدیبلر
**********
ازّل ازونه سو یولونی باغلادی اعدا
سولدی سوسوزوندان سارالوب گلشن طاها
بلبل کیمی گلدی بالالار نالیه امّا
موج ائتدی فراتین سویی صحرالره آخدی
خردا بالالار آغلادی حسرت گؤزی باخدی
**********
اسدیریدی سموم ستمی لشکر کینه
یاندی سوسوزوندان گول گلزارمدینه
بنزردی ساری بیر گوله رخسارسکینه
اوخشاردی علی اصغره دیلده سؤزی ایوای
آغلاردی دییردی سود امرقارداشا لای لای
**********
نه تک سو یولون باغلادیلار فرقه عدوان
اوچ گون دئمیر‌م اهل حرم قالدیلا عطشان
اما دئیور‌م وئردی حسین اکبری قربان
دوغراندی او صحراده سوسوز مظهرطاها
وار حقّی تؤکه گؤز یاشینی قبریده لیلا
**********
عبّاسیده یوز قویدی فراته سو گتیرسین
لب تشنه‌لرین زخم دلین بلکه بیتیرسین
بیرمشک سوقورموش لب اطفاله یتیرسین
سو وئرمدی شام اهلی گؤزی اشگیله دولدی
اوخلاندی سو مشکی ایکی قوللار قلم اولدی
**********
بیر یاره دگوب اولمادی یاراسی قیامه
آتدان نجه دوشدی یازا شرم ائیلوری خامه
تؤکدی گؤزونون یاشینی اوز دوتدی خیامه
عرض ائیلدی قان ائتدیله گؤز یاشیمی قارداش
تئز گل کسور اون یئددی نفر باشیمی قارداش
**********
شمیم عاشورا_جلد اول
حاج اصغر احمدیان خسروشاهی